Manifiesto de PODEMOS Aragón. 23 d’abril de 2020.
Este no ye un 23 d’abril mas. Este Día d’Aragón no podremos abrazar-nos en as carreras, bailar, mercar libros, trobar-nos con as nuestras y os nuestros vecins, entregar en man rosas y borrainas, ni desfrutar-nos d’os nuestros lugars, barrios y ciudatz. Este 23 d’abril no empliremos las plazas pa reivindicar lo nuestro present y futuro, como han feito per decadas los nuestros mayors, con dignidat y humildat, exichindo lo que nos perteneix: un Aragón de futuro an que dengún no quede dezaga.
Gracias a la mobilización y lo esfuerzo de mils d’aragonesas y aragoneses que hue per tot lo nuestro territorio (institucions, teixiu asociativo y solidario) son amostrando la suyo millor cara, en estes días de gran sofrimiento y dolor.
Como no podría estar d’atra manera, vaiga la nuestra primer memoria, carinyo y empatía ta las personas que han perdiu a un ser queriu y no han puesto acompanyar-le como mereix. En estes momentos de duelo habremos de treballar en un abrazo colectivo, a lo qual nos sumamos, pa cobrir con ell ixa amarga despedida.
Esta crisi no tiene garra cosa positiva. Y, con tot y con ixo, lo pueblo aragonés amuestra la suya gran chenerosidat y valura con cenyos, entrega, emparo mutuo y retz vecinals que portan esperanza y cubren las carencias d’o sistema.
Un aplauso a profesionals sanitarios y sociosanitarios en residencias y atención a domicilio; agricultors, transportistas, treballos de reparto y comercios de venta a lo publico, empresarios, emerchencias, bombers, efectivos de protección civil y seguranza, policías, militars, psicologas, limpiadoras, totas las que cudian, treballadors publicos que teletreballan, personas que fan caretas, respiradors u pantallas protectoras, investigadors, scientificas y un largo etcetera.
Podemos Aragón reivindicamos que hemos de cudiar a qui nos cudian en estes momentos tant dificils.
Especial reconoiximiento a la mayoría d’a chent que s’ha estau un mes y meyo en casa a conseqüencia d’esta grieu pandemia sin precedents. En especial pa las familias mas precarias y con especials dificultatz, per razons economicas u de salut. I hai una parte de miedo que no podemos negar, pero sobretot i hai una gran responsabilidat colectiva d’estar-se en casa pa superar antes con antes esta situación, privar lo colapso d’a sanidat publica y frenar la curva de contachios per lo coronavirus. Los aplausos d’as 8 d’a tardada emocionan. Con ells, tota mena de personas nos conoixemos y reconoixemos, en un momento d’unión que per ell mesmo ya ye una esperanza colectiva pa superar este gran reto y atisvar un mundo millor.
Esta pandemia nos amuestra que nos hemos d’aprestar, con intelichencia colectiva, y reaccionar debant d’os anuncios scientificos y de personas expertas, que fa decadas que anuncian la posibilidat de nuevas malotías y fenomenos atmosfericos catastroficos, a conseqüencia d’o cambio climatico.
Dende Aragón reivindicamos la descentralización democratica, que demuestra estes días la gran importancia de totas las nuestras representants publicas dende cadaún d’os concellos y institucions propias con capacidatz y competencias importantismas y mas cercanas a la ciudadanía. Pero tamién trobamos a faltar un ret global d’institucions democraticas que articule millor la colaboración debant de situacions que afectan a tota la planeta. Dende Aragón seguimos empentando enta una gobernanza global mas rigorosa en os suyos diagnosticos y con actuacions compartidas, refirmadas en a sciencia, la investigación, la salut y, sobre tot, aduyas economicas urchents pa qui mas las precisen.
Hue la politica ye mas important que nunca pa convertir esta amalgama plural de incertitutz, irritacions y trachedias en propuestas y prochectos concretos que traigan solucions y caminen enta una sociedat mas equitativa, que no deixe dengún dezaga. Y ixo ye lo que somos fendo allí an que somos, en os retz populars, institucions, parlamentos y gubiernos, enfortindo un escudo social con millors servicios publicos, protección pa qui mas lo precisen, propuestas en harmonía con a planeta y accions feministas pa amillorar los cudiaus. La nuestra propuesta y acción politica se basa en propuestas pa l’abance social.
Astí an que somos, femos per dar lo millor de cada persona y no repetir errors y recetas fracasadas, como las que nos portoron las retalladas, privatizacions, precariedat y desigualdat d’a zaguera crisi de 2008. Las solucions hue no pasan per banderas a meyo palo, ni per falorias ni parolas vacivas pa causar crispación. Pasan per enfortir lo publico y no estar pas dependients ni submisos a los mercaus especuladors que nos fan mas frachils. D’esta, n’hemos de salir totas chuntas, sin deixar a dengún dezaga.
Aragón tenemos muitas posibilidatz, somos un pueblo capaz en un territorio fertil y con enormes potencialidatz. Aproveitemos tot que tenemos, que ye muito, pa trazar un plan de recuperación social y economico valient y ambicioso, con mirada larga, cooperación y fuyindo de plantiamientos a curto termin. Conscients que somos una sociedat aviellada y con muitos lugars dispersos que queremos que sigan vivos.
Dende Podemos Aragón seguiremos desfendendo los servicios publicos, cautivando l’emparo mutuo, la solidaridat, la cooperación, los biens comuns y lo sentiu colectivo enta una nueva gobernanza. Ye la hora de reivindicar mas que nunca una sanidat y servicios publicos universals y de calidat. Potenciando-los podremos fer posible ixe Aragón que tantas vegadas hemos desfendiu.
Sentimos Aragón, la nuestra tierra y las nuestras chents, la nuestra historia y las nuestras identidatz, hue con dolor pero tamién con esperanza y confianza en a nuestra intelichencia colectiva como pueblo. Sabendo d’án venimos, per qué salimos, per qui luitamos, seguiremos insistindo pa que dengún no quede dezaga. Con un pueblo valient y organizau, dende las finestras y los balcons dica las institucions, tornaremos ta las plazas y lo faremos con a suma de tantas y tantos, comprometius en seguir transformando Aragón.
